Quixera pechar hoxe esta parte á que levamos adicando xa uns poucos fascículos e na que estou a tratar de propoñer un xeito que che resulte simple para a xestión das túas propias cargas de adestramento cando xa facemos traballos realmente intensos onde a Frecuencia Cardíaca non é tan boa referencia e non contas con un medidor de potencia, que é a medida de carga externa por excelencia no noso deporte.
Como vimos no pasado fascículo o adestramento guiado polas propias percepcións do atleta pode dar incluso mellores resultados que outros métodos, mais debes ter en conta un par de cuestións fundamentais:
A primeira é que vas precisar un valor, un número, para poderes ir comparando, sumando, restando. Sexa cal sexa a métrica empregada isto é o traballo que fai un adestrador para saber, ó igual que o cociñeiro na grella, “como está a carne por dentro sen ter que cortar”. Para isto vouche propoñer un método -… o método de Botis? - Non, non. Vai ser o teu. Aquí vas ter un punto de partida sobre o cal ti poidas construír a túa propia métrica.
Imos ó grao: (E x T) / 10.
Para cuantificar a carga de cada un dos teus adestramentos e outorgarlle un valor que che vaia resultar útil e poder saber, progresivamente, como estás a adestrar e cando poder prever ter un pico de forma (por exemplo) debes poder tomar en conta dous parámetros fundamentais:
“E” será o esforzo, que nivel de esforzo supuxo para ti. Aquí haberás de prestar atención ante todo ás partes de maior intensidade como subidas, repeticións… o que tocase no día en cuestión. Para non liarte máis nada mellor que botar man dunha escada ben estendida como a de Borg.
Por si soa a intensidad, como ben sabes como bo lector da NAVALLA, non vai representar gran cousa e por iso a imos poñer en relación co tempo de exercicio: o tempo en minutos da túa saída.
Asi por exemplo, se saes hora e media e sobes dúas veces un porto de 3km que tes alí preto a unha intensidade de 8 que corresponde cunha intensidade superior ó teu segundo umbral (as 16 válvulas… ti que les a NAVALLA xa ben sabes) poderás obter algo similar a:
Carga do día: (8 x 90) / 10 = 72.
Para outro exemplo podemos escoller un paseo tranquilo con un colega de dúas horas ó que lle outorgues un 3 na túa escada de Borg:
Carga do día: (3 x 120) / 10 = 36.
Deste xeito podes comezar a dividir os teus adestramentos entre duros (nos que obteñas un valor próximo a 100) e os de recuperación que deberán dar un resultado menor de 50.
Velaí tes unha métrica propia sobre a cal podes ir traballando para maximizar o teu rendemento sobre a bici asi como o disfrute de cada día de adestramento.
Pero díxenche que había dous puntos a ter en conta, o segundo punto é a experiencia na observación das percepcións. É moi común, salvo en deportistas de elite, que se subestime moito o nivel de esforzo, principalmente en deportes de resistencia. Na miña modesta opinión isto débese fundamentalmente á falta de traballo a baixas intensidades e ó feito de non manter a intensidade nas baixadas.
Presta atención as túas sensacións, vai tomando notas e apunta comentarios alí onde leves o rexistro dos teus adestramentos, Strava permite esta opción, e permítete mellorar disfrutando.
Se queres afinar un pouco máis a puntería ou levar os teus adestramentos a outro nivel adestrando máis e mellor sen deixar nunca de lado a diversión pásate pola miña web ou apunta o meu mail, que están aí abaixo.
Lémonos aquí e saudámonos na estrada!
Podes contactarme en:
bts.rendementosaudable@gmail.com
Podes unirte a:
.JPG)
.png)
0 Comentarios
Gracias por su comentario